ნინი ზარქუა: "ამდენი წელი გავიდა და მაინც ვერ ვეგუები, რომ ამისულა სხვაგან არის"
"მსოფლიოში ფეხბურთელებისა და მოდელების დაწყვილების ტენდენციაა. ალბათ ფეხბურთელებს კარგი გემოვნება აქვთ და იმიტომ", – ამბობს ფეხბურთელ ალექსანდრე ამისულაშვილის, თანაგუნდელებისა და ახლობლებისთვის ამისულას, ცოლი, თავადაც მოდელი ნინი ზარქუა. თბილისში ის მოდური წვეულებების ხშირი სტუმარია და, რა თქმა უნდა, სტადიონისაც, როდესაც მისი ქმარი თამაშობს. ამ დროს ნინი საშინლად ნერვიულობს.
ამისულა საქართველოს ნაკრების წევრია. ამჟამად რუსეთში, სამარაში თამაშობს და საქართველოში წელიწადში ორჯერ ჩამოდის – ზამთარსა და ზაფხულში. ცოლი და ორი შვილი – 6 წლის ანანო და 4 წლის საბა – თბილისში ჰყავს დატოვებული და ოჯახისთვის მისი ყოველი ჩამოსვლა ზეიმია. რას ნიშნავს ფეხბურთელის ცოლობა და როგორია შეხვედრები განშორებების შემდეგ, ამის შესახებ ამისულას მეორე ნახევარი გვიამბობს.
– ნინი, როგორ დაიწყო ფეხბურთელის და მოდელის სიყვარულის ისტორია?
– საერთო სამეგობრო წრეში გავიცანით ერთმანეთი. ამისულა მაშინვე არ მომწონებია, თავად იაქტიურა. იმ პერიოდში კიევში თამაშობდა. თბილისში არ იყო და მობილურით ვეკონტაქტებოდით ერთმანეთს. მე 17 წლის ვიყავი, ამისულა – 23 წლის. მკაცრი მშობლები მყავს და გვიან გარეთ არ მიშვებდნენ, სულ მაკონტროლებდნენ. ისევ მეგობრების წრეში ვახერხებდით ერთმანეთის ნახვას. ასე განვითარდა ჩვენი ურთიერთობა და ერთი წლის მერე ოჯახი შევქმენით. ქორწილი არ გვქონია, მიუხედავად იმისა, რომ დიდი ქორწილი მინდოდა. ფაქტობრივად, ამისთვის დრო არ დაგვრჩა. მხოლოდ ჯვარი დავიწერეთ.
– ფეხბურთელის ცოლობა მაშინვე გაითავისეთ თუ გარკვეული დრო დაგჭირდათ, რომ მისი რეჟიმის თავისებურებებს შეგუებოდით?
– თავიდანვე ვიცოდი, რომ ეს რთული იქნებოდა. ამდენი წელი გავიდა და მაინც ვერ ვეგუები, რომ სხვაგან არის. რა თქმა უნდა, იქიდანაც მთავარ როლს თამაშობს და თითქმის ყველა წვრილმანს ვუთანხმებ, მაგრამ, ბუნებრივია, მინდა, გვერდით მყავდეს. ვნერვიულობ, როცა თამაშზე გადის. ჩემდაუნებურად შემიყვარდა ფეხბურთი, რადგან უკვე 7 წელია ჩემი მეუღლის თამაშებს ვუყურებ.
– ის სამარაშია, თქვენ – თბილისში, როგორ ახერხებთ, რომ ყველა წვრილმანი შეუთანხმოთ, რაღაცას ალბათ მაინც დამოუკიდებლად წყვეტთ.
– აბსოლუტურად ყველა დეტალს ვუთანხმებ. საოჯახო საკითხებს მარტო არ ვწყვეტ. ახლა საბუკა ფეხბურთზე დამყავს. უნდა, მამასავით სპორტსმენი გამოვიდეს. ანანოს კი მოდელობა სურს.
– ესე იგი ფეხბურთელისა და მოდელის ოჯახმა გაამართლა?
– ფაქტია, რომ მსოფლიოში ფეხბურთელებისა და მოდელების დაწყვილების ტენდენციაა. ალბათ ფეხბურთელებს კარგი გემოვნება აქვთ.
– ოჯახის შექმნის შემდეგ პოდიუმს ხომ არ დაემშვიდობეთ?
– არა, ახლაც გამოვდივარ თბილისის მოდის კვირეულების ჩვენებებზე, მაგრამ თვითონ მირჩევნია, პატარა თაობას დავუთმო ასპარეზი. თუ ძალიან მთხოვენ ჩემი მეგობარი დიზაინერები, მაშინ გამოვდივარ.
– ქმარი ხომ არ ეჭვიანობს, როცა პოდიუმზე გხედავთ?
– არა, რადგან საბაბს არ ვაძლევ. არ გვაქვს ისეთი ურთიერთობა, რომ რამეში შემზღუდოს.
– არც თქვენ ეჭვიანობთ შორს მყოფ ფეხბურთელ ქმარზე?
– ეჭვიანობას ბევრი ცუდი მოაქვს, ამიტომ ვცდილობ, ამ თემაზე არ ვიფიქრო. ჩემს ქმარს ვენდობი.
– ხანგრძლივი განშორებების შემდეგ ალბათ განსაკუთრებულ სიურპრიზებს და საჩუქრებს გიწყობთ, როცა ერთმანეთს ხვდებით.
– სიურპრიზების მოწყობა არ ეხერხება. წინასწარ ვხვდები, რას მაჩუქებს და ამაზე სულ ბრაზდება. ამისულა რომანტიკული არ არის, ამის დრო არ რჩება.
– რა სჭირდება ამისულას სახლში იმისთვის, რომ თავი კარგად იგრძნოს?
– ბავშვებთან ერთად დიდ დროს ატარებს. ეს მისთვის დასვენება და განტვირთვაა. ძალიან კარგად ვაკეთებ სპაგეტის. ქართულ კერძებს არ ვამზადებ, ამაზე სახლის მომვლელი ზრუნავს. რუსეთში როცა ვართ და ამისულას ქართული კერძი მოენატრება, მაშინ ვამზადებ. მეგრელი ვარ და, მაშასადამე, გურმანიც.
– შეგიძლიათ ელარჯი გააკეთოთ?
– როგორ არ შემიძლია! არ მიყვარს, როცა ამბობენ, რომ კვერცხსაც ვერ წვავენ. ორსულობის დროს თურქეთში ყოფნისას ძალიან მომინდა ელარჯი და ჰოლანდიური ყველით გავაკეთე. ხომ წარმოგიდგენიათ, რა იქნებოდა, მაგრამ მე მომეწონა. ამისულას არ გაუსინჯავს.
– თქვენი შეხედულებები და აზრები ყოველთვის ემთხვევა ერთმანეთს თუ კამათიც მოგდით რაიმე თემაზე?
– ამისულა ზოგადად არ არის კონფლიქტური, არც მე ვარ ძალიან ჯიუტი, ამიტომ ერთმანეთს ვუთმობთ. რა თქმა უნდა, არსებობს თემები, რაზეც შეიძლება უთანხმოება მოგვივიდეს, მაგრამ ეს გლობალური მასშტაბის არასოდეს არის.
– რა არის თქვენი საერთო თვისება?
– ორივეს ძალიან გვიყვარს წიგნების კითხვა, მუსიკაც ერთნაირი მოგვწონს.
– როცა ქმარი თქვენთან არის, თბილისში, ალბათ გასართობ ადგილებში დაყავხართ.
– არ გვიყვარს კლუბებში სიარული, მით უმეტეს, თბილისში. შეიძლება რესტორანში დავსხდეთ მეგობრებთან ერთად და ვისაუბროთ. ამისულას არ უყვარს სმა, მიუხედავად იმისა, რომ კახელია.
– მეგრელი ცოლი და კახელი ქმარი – კუთხური განსხვავებულობა ოჯახში თავს რითი იჩენს?
– არა, ეს ოჯახში არ იგრძნობა. დედამთილ–მამამთილთან ვმეგობრობ. ისინი თელავში ცხოვრობენ, მშობლიური სახლი არ მიატოვეს.
– ორ შვილს დამოუკიდებლად ზრდით?
– დედაჩემი სახლში თუ არ მყავს, ვერაფერს ვაკეთებ. როცა დასასვენებლად მივდივარ, ბავშვებს მხოლოდ დედას ვანდობ. მისი მადლიერი ვარ.
– ქართველი ფეხბურთელების ცოლები მეგობრობთ?
– კი. ანუკი არეშიძესთან, სალომე ღვინიაშვილთან და სხვებთან ძალიან ახლო ურთიერთობა მაქვს. სულ ერთად ვართ. ნაკრების თამაშებს ვესწრებით. ყველამ იცის სამეგობროში, რომ ძალიან ემოციური ვარ. არ შემიძლია, თამაშს მშვიდად ვუყურო. სულ მეშინია, ამისულამ ტრავმა არ მიიღოს.
– შეგიმჩნევიათ, რა განსხვავებაა ქართველი და უცხოელი ფეხბურთელების ცოლებს შორის?
– რუსი ფეხბურთელების ცოლებისგან განსხვავებით, ჩვენ ვმეგობრობთ. რუსი სპორტსმენების ცოლები ერთმანეთის კონკურენტები არიან, ვის უფრო კარგად აცვია და ა.შ. ქართველები გემოვნებიანი ერი ვართ. რუსი სპორტსმენების ცოლები სტადიონზე საგულშემატკივროდ ისეთი გამოპრანჭულები მიდიან, თითქოს რაიმე საღამოზე იყვნენ.
– თქვენც ერთ–ერთი მოდურად ჩამცმელი ხართ თბილისში. თქვენი ქმარიც ერკვევა მოდაში?
– ჰო, ძალიან მიყვარს ჩაცმა. შოპოჰოლიკი არ ვარ, მაგრამ მიყვარს კარგი აქსესუარები, ჩანთები და ფეხსაცმელები. ამისულა სამოსთან დაკავშირებით რჩევებს არ მაძლევს. ის საათებში ერკვევა ძალიან კარგად და ასეთ დროს ვეკითხები რჩევას. ისე კი თავადაც ძალიან კარგი გემოვნება აქვს.
– ორი შვილის დედას ისევ მოდელის ფიგურა გაქვთ შენარჩუნებული. ამას როგორ ახერხებთ?
– გენეტიკურად არ ვარ სიმსუქნისკენ მიდრეკილი, ამავდროულად საღამოს საათებში ჭამას ვერიდები და ვვარჯიშობ. სახის კანისთვის ჩემი ასაკის შესაფერის საცხს ვიყენებ. პლასტიკური ქირურგიისთვის არასოდეს მიმიმართავს. ჯერჯერობით მხოლოდ ეს არის ჩემი რეცეპტი.
– რა განსხვავებაა ოჯახური ცხოვრების დასაწყისსა და თქვენი ცხოვრების ამ ეტაპს შორის?
– თავიდან ორი უცხო ადამიანი ცდილობს, ერთად იცხოვროს, გაიცნოს ერთმანეთი და ერთმანეთის წესები. დღეს შემიძლია ვთქვა, რომ ამისულა უფრო მეტად მიყვარს, ვიდრე წლების წინ.
მანანა ნოდია
